Cabreiros vs SD Guitiriz 2017/2018

Traballada e meritoria victoria en Cabreiros

Na 12º xornada de liga a SD Guitiriz visitou ao Cabreiros, 1º contra 2º, dous conxuntos que chegaban a este encontro cunha media de máis de 3 goles no caso do noso equipo e case 3 no do Cabreiros, como contrapunto tamén se median dous dos conxuntos menos goleados.

Un bo comezo da SD Guitiriz permitiulle tomar o mando do encontro e dispuxo de dúas claras ocasións de gol para adiantarse no marcador. Pasado o primeiro cuarto de hora de xogo chegou o tanto que definiu o encontro, foi nunha xogada a balón parado que Iván Ansede rematou a gol.

Co gol en contra o Cabreiros mostraba dúbidas no seu xogo e a SD Guitiriz controlaba as intentonas locais sen demasiados atrancos. Unha xogada de estratexia do conxunto local ía rematar cunha pena máxima que Jesús logrou deter. Foron os mellores minutos do Cabreiros que apretou na procura do empate pero sen éxito ante unha SD Guitiriz que se mostrou moi sobria neste tramo de encontro.

Na segunda metade o Cabreiros perdeu folgos e tivo problemas para xerar perigo ao mesmo tempo que co paso dos minutos quedaba máis exposto ante as contras da SD Guitiriz que puido sentenciar o encontro en varias ocasións no tramo final.