Empate que sabe a pouco en Barreiros

Celta Barreiros vs SD Guitiriz. Primeiro Equipo

Na tarde do sábado, o primeiro equipo viaxou á mariña lucense para desputar o décimo segundo encontro da competición regular no Cascabeiro, ante o Celta Barreiros.

Con motivo do día contra a violencia de xénero, ambos conxuntos quixeron sumarse á causa vestindo a camisola de cor negro antes do partido e brindando xunto cos afeccionados presentes no estadio en contra de calquer acto violento.

Tra-la homenaxe deu comezo o xogo, no que o cadro chairego entrou con mal pé e pouco tempo termou coa porta imbatida, pois Jhoseba aproveitaría un malentendido na zaga para bater a Jesús apenas transcorridos seis minutos. (1-0, 6′)

Na seguinte xogada o Guitiriz puido empatar cun gran balón ás costas da defensa, mais Javi foi derrubado na área e non puido rematar a porta.

Co paso dos minutos, os visitantes iríanse atopando máis cómodos sobre o céspede, conseguindo saír a maior parte das veces en curto, rexeitando calquera oportunidade de perigo a prol do Barreiros e ameazando a área rival aínda que sen xerar opcións manifestas.

Sería case chegando ó tempo de lecer onde os nosos darían o golpe do empate, Labrada conseguiría prolongar un bo balón de Javi á área para que, no segundo pau, Antón empurrara o balón ó fondo da rede. (1-1, 39′)

Con táboas no marcador chegaría o descanso, que serviu ó Guitiriz para coller folgos e empezar o segundo tempo cun pouco máis de intensidade.

Só pasarían dez minutos dende o pitido inicial do segundo tempo, cando de novo Javi sería derrubado na área. Esta vez o colexiado Ron Valle sinalaría o punto de penalti que acabaría transformando Ansede despois de enganar ó porteiro. (1-2, 55′)

O gol daría confianza ó cadro visitante que, por un tempo, soubo controlar o ritmo do encontro e xogar coa vantaxe no electrónico, mais a peor noticia chegaría xa transcorrida a hora de partido cando Jose tivo que abandonar o terreo de xogo tras sentir un pinchazo no bíceps femoral da perna dereita, que a falta das pertinentes probas médicas, todo apunta a unha rotura do músculo. (Jordi por Jose, 65′)

Tra-la reconfiguración do esquema, o Guiti manteríase firme, sen conceder perigo a prol dos barreirenses, pero o terreo de xogo e o paso dos minutos empezaría a facer mella nas pernas dos xogadores. O encontro rompeuse e o cadro mariñano puido empezar a xerar máis perigo.

Finalmente acabaría chegando o gol local tras unha xogada a balón parado na que Víctor aproveitou un balón morto dentro da área para poñer o definitivo dous a dous. (2-2, 80′)

Ningún dos equipos se contentaba só cun punto, polo que fixeron desfrutar ós espectadores dunhos emocionantes minutos finais, con ocasións polos dous bandos, aínda que sen sorte. Javi tivo a derradeira oportunidade do encontro, mais acabaría sendo anulada por fora de xogo.

Co pitido final voltou a sensación de rabia ós nosos, mais agora deberán desconectar da competición regular para desputar o vindeiro domingo o partido correspondente ós dezaseisavos de final da Copa Deputación, que os enfrentará ó Mondoñedo no Suso Cruz nunha eliminatoria a partido único polo pase á seguinte rolda.

Festa de goles, con igualada, do Infantil ante o Foz

SD Guitiriz vs CD Foz. Infantil

O choque do infantil ante o Foz deixou 8 tantos, catro por equipo, nun enfrontamento cheo de alternativas no xogo e no marcador. Os visitantes puxéronse moi rápido con 0-2, concretamente con 7 minutos xogados. Aí demostrou unha vez máis a súa capacidade de reacción o infantil, cun Adrián moi inspirado ante o gol conseguiu darlle a volta ó resultado e poñerse por diante no comezo da segunda metade.

O Foz non baixou os brazos e volvía voltear o marcador con pouco máis de dez minutos por desputar. Hugo Pena cun lanzamento de falta ía establecer o definitivo 4-4.

O inicio lastrou ao xuvenil ante o Foz

SD Guitiriz vs CD Foz. Xuvenís

Facía apenas unhas semanas que se veran as caras, naquela ocasión no Municipal de Foz, o noso xuvenil realizara posiblemente o mellor encontro da tempada e coa idea de repetir rendemento e sensacións encaraba o choque.

Pero o comezo do mesmo, puxo por diante moi rápido ao CD Foz con dous tantos de diferenza no marcador. O xuvenil seguiu competindo pero coa moral xa bastante mermada. Co paso dos minutos e sobre todo no último tramo os visitantes ampliaron o marcador ata deixar o definitivo 0-7 no marcador.

Varios xogadores da base citados polos combinados provinciais

Formación infantil SD Guitiriz

Esta semana fixéronse públicas as diversas convocatorias das seleccións provinciais, nas categorías Sub 13 e Sub-11 foron citados dous xogadores do noso clube en cada categoría para os adestramentos que se celebrarán nos vindeiros días.

Para o adestramento da Sub 13 foron citados Anxo e Asier mentres que na categoría Sub-11 Aitor e Jony acudirán á sesión de traballo previa aos próximos campionatos comarcais.

Sen dúbida un recoñecemento ao traballo destes xogadores do noso club, pero sobre todo un recoñecemento ao labor que veñen realizando ambos planteis e os seus técnicos.

Final desafortunado ante o Cabreiros

SD Guitiriz vs Cabreiros

O Suso Cruz acollía, na tarde do domingo, unha das citas máis importantes ata o momento.

O primeiro equipo recibía ó Cabreiros, ambos con dezaoitos puntos, na loita polos postos altos da táboa.

Os nosos sairon con intensidade e, durante os primeiros minutos dominaron o xogo, aínda que sen crear moito perigo, o cadro de Jose Carlos foi quen de conxugar varias xogadas combinadas.

A primeira mala noticia para o conxunto guitiricense chegaría ó cuarto de hora do encontro. Adrián Novo, con molestias na parte posterior do muslo dereito, tería que ser sustituído para dar entrada a Antón (Antón por Novo, 17′).

Con este cambio o cadro técnico tivo que reaxustar posicións, Javi ocuparía o carril de Novo, e Antón pasaría á dianteira xunto con Alvariño.

Ó pouco tempo e tras unha boa xogada persoal, Javi conseguiría meter o balón preto da área pequena, onde nin Antón nin Alvariño conseguiron acadar o remate.

O primeiro tempo transcorrería coa sensación de dominio local que, aínda sen xerar moito perigo, tampouco recibiría ningunha ocasión clara por parte do Cabreiros.

O comezo da segunda metade seguiría na mesma línea, ata que no minuto cincuenta e cinco Alvariño forzaría o segundo cartón amarelo de Cristian Otero.

O que parecía ser un punto de inflexión a prol, convertiríase no arma máis perigosa para o Cabreiros, que ó reaxustar o seu once aproveitou a falta de intensidade do cadro local para pasar a crear máis perigo.

Ó final dun segundo tempo bastante inerte, nunha xogada a balón parado chegaría o gol dos visitantes. (0-1, 81′)

O Guitiriz cambiou o chip, aínda que demasiado tarde. Mais nos últimos intres tería ocasións dabondo para empatar; Antón non puido controlar un gran balón de Cabado ás costas da defensa, e Javi tamén a tivo a balón parado.

Xa no desconto, unha gran xogada combinada polo carril dereito acabaría por poñer o balón no punto de penalti, onde Alvariño remataría pero o balón sairía rexeitado por un defensa.

A ocasión máis clara sairía das botas de Jose, cun fantástico golpeo tras un rexeite na frontal; o balón que ía directo o ángulo da porteria acabaríao despexando a córner Paulino coa xema dos dedos.

Tra-lo córner chegaría o pitido final do colexiado Lago Barreiro, que poñería fin a un encontro desputado no que o se escapan tres puntos importantes do Suso Cruz, para colocar ó primeiro equipo na séptima posición da táboa afastado por catro puntos da segunda plaza de ascenso.

Na vindeira xornada, os nosos viaxarán a Barreiros para desputar a duodécima xornada de liga, co obxectivo de voltar co triunfo.